Eindhoven-en (Herbehereetan) jaioa da, eta Camprodon eta Bartzelona artean bizi da. Ezkonduta dago, eta bi semeren aita da. Enpresen Administrazioa eta Zuzendaritzan lizentziaduna da, eta doktorea Giza Zientzietan. Hezitzaile eta hizlari gisa lan egiten du, eta Merkataritza Zuzendaritzako eskolak ematen ditu Kataluniako Nazioarteko Unibertsitatean eta Bartzelonako Unibertsitatean. Barna Consulting Group-eko lehendakariordea izan zen, eta IESEko Assistant Professor ere bai. Victor Kúppers-ek eskolen eta ikastetxeen gonbidapenak jasotzen ditu gurasoei “Gogo handiz bizitzea familian” gaiari buruzko hitzaldiak emateko.
Bokazioz aritzen da prestakuntzan, lan zoragarria baita —dio. “Ez naiz aditua eta ez daukat ikertzeko edo gauza berriak sortzeko gaitasunik; adituak irakurtzen ditut, gustatzen zaizkidan ideiak kopiatzen ditut eta haiek transmititu, horixe egiten dut. Ez naiz jakintsua, baina jakintsuak irakurtzen ditut. Erabat sinesten dut pertsona guztiek dituzten aukeretan eta gure jarrera pertsonalek gure ahalmen ikaragarria garatzeko duten garrantzian. Nire lanean oso garrantzitsutzat jotzen dut pertsonek printzipioetan eta giza balioetan oinarrituta lan egitea. Sinetsita nago zentzua duen bizitza bakarra zentzuz bizitzen dena dela”.
“Bizitza zentzuz bizitzea” (Vivir la vida con sentido) izeneko liburu arrakastatsuan oinarritzen da bere hitzaldia, baina familiaren prisma batetik begiratuta eta gazteei eta helduei zuzenduta, jarraibideak, ilusioa eta konfiantza emateko familia bat eraikitzeak ekartzen duen bizitza- eta heziketa-proiektuan.
“Zuk pentsatzea lortu nahi du, modu arin eta argian, ideiak ordenatzeko, lehentasunak ezartzeko eta erabakiak hartzen laguntzeko. Ikuspuntu oso erraz, hurbileko eta praktiko batekin, bizitza zentzuz bizitzeak duen garrantziaz hausnarketa egitera gonbidatzen gaitu. Izaeragatik balioesten ditugu pertsonak, beren jarrerengatik, eta ez beren ezagutza, titulu edo esperientziagatik. Pertsona zoragarri guztiek izaera zoragarria dute, eta hala moduzko pertsona guztiek hala moduzko izaera. Ez gaituzte daukagunagatik estimatzen, izateko moduagatik baizik. Bizitza zentzuz bizitzeak honetaz jabetzen lagunduko dizu: bizitzan garrantzitsuena dela bizitzan garrantzitsuena dena izatea garrantzitsuena, borrokatzean jarri behar dugula arreta eta ez negar egitean, gauzak egitean eta ez kexatzean, nola garatu behar ditugun poza eta gogo bizia, eta adeitasuna, esker ona, eskuzabaltasuna, pertseberantzia edo zintzotasunaren gisako balioak berreskuratu behar ditugula. Azken finean, balioei, bertuteei eta bizitzarako jarrerei buruzko hitzaldia, handia izatea izateko modu bat baita”.